ایس آفت نوں ٹال دے مولا

(ارشد محمود ارشد)

ربّا میریا سوھنیا ربّا
تیرے اگے ہتھ میں جوڑاں
جہڑی غلطی ہو گئی ساتھوں
معافی دے چھڈ
منیا اساں وی ات چک لئی سی
تیری حکم عدولی ساڈا فیشن بنیا
ہر اک ڈاڈے بندے نوں رب منن لگ پیئے
سائنس دیاں ایجاداں اگے متھے ٹیکے
نکی جہی ایہ گل وی بھل گئے
طاقت بخشن والا توں ایں
عقلاں دیون والا توں ایں
جے کر تیرا ” کُن ” نہ ہووے
بندہ لکھ پیا ٹکراں مارے
کج نئیں ہوندا
مدتاں پچھوں ۔۔۔۔
بھُلیاں لوکاں نوں ایس کہڑے گل سمجھائی
سب توں وڈی کبریائی
تیرے قہر نوں بھلے لوکی
ایسے لئی تاں رُلے لوکی
ربّا ۔۔۔۔ میریا سوھنیا ربّا
جے کر نام قہار اے تیرا
تے رحمٰن ، الرحیم وی توں ایں
اپڑیں رحمت کر دے مولا
ساڈھی جھولی بھر دے مولا
کالی رات اُجال دے مولا
ایس آفت نوں ٹال دے مولا

(مفہوم)

Comments are closed.